Endokrinoloq qəbulu
Anamnez, fiziki müayinə və hədəflənmiş laborator qiymətləndirmə ilə tam endokrinoloji baxış.
ƏtraflıHamiləlik planlaması və hamiləlikdə endokrin təqib
Hamiləlikdən əvvəl, hamiləlik zamanı və doğuşdan sonra hormonal təqib.
Qısa cavab
Hamiləlikdən əvvəl, hamiləlik dövründə və doğuşdan sonra hormonal göstəricilərin izlənməsi və tənzimlənməsidir. Qalxanabənzər vəz hormonları, qan şəkəri, prolaktin və digər göstəricilər həm ananın, həm də dölün sağlamlığına birbaşa təsir edir.
Hamiləlikdən əvvəl
Hamiləlik planlayan hər qadına tiroid funksiyasının (TSH) yoxlanılması tövsiyə olunur. Xüsusilə aşağıdakı hallarda:
- Əvvəllər tiroid xəstəliyi diaqnozu qoyulubsa
- Ailədə tiroid xəstəliyi varsa
- Anti-TPO antitelləri yüksəkdirsə
- Aybaşı pozğunluğu, hamilə qala bilməmə problemi varsa
- Prolaktin yüksəkliyi aşkarlanıbsa
- Polikistik yumurtalıq sindromu varsa
- Şəkərli diabet və ya prediabet varsa
- Artıq çəki və ya insulin müqaviməti varsa
Şəkərli diabeti olan qadınlar hamiləlik planlamazdan əvvəl xəstəliyin və antidiabetik dərmanların ana və dölə mümkün təsirləri barədə məlumatlandırılmalı, göstəricilər hamiləlikdən əvvəl hədəfə gətirilməlidir.
Hamiləlik zamanı
Qalxanabənzər vəz
Hamiləlikdə müalicə olunmayan hipotireoz ana üçün ürək-damar problemləri və yüksək təzyiq, döl üçün isə inkişaf geriliyi, düşük və erkən doğuş riskini artırır. Buna görə hamilə qalan hər qadına ən azı bir dəfə tiroid hormonuna baxdırmaq tövsiyə olunur. Əvvəldən hipotireozu olan qadınlar hamiləlikdən əvvəl, hamiləlik zamanı və doğuşdan sonra həkim nəzarətində olmalıdır.
Hamiləlik diabeti
Bütün hamilələrdə aclıq qlükozası yoxlanılır; risk qrupunda olmayan hamilələrdə 24–28-ci həftədə qlükoza tolerantlıq testi (OGTT) aparılır. Risk faktorları olan hamilələrdə müayinələr daha erkən başlanır.
Yüksək təzyiq
Hamiləlik dövründə antihipertenziv dərmanlar özbaşına istifadə edilməməlidir.
Doğuşdan sonra
- Hipotireozu olan xəstələrdə doğuşdan sonra dərman qəbulunun davam etdirilməsi və dozanın yenidən dəyərləndirilməsi
- Postpartum tiroidit — doğuşdan sonrakı aylarda qalxanabənzər vəzin alovlanması: oyanıqlıq, əllərdə titrəmə, ürək döyüntülərinin artması ilə özünü göstərə bilər
- Hamiləlik diabeti keçirmiş qadınlarda gələcəkdə tip 2 diabet riskinin qiymətləndirilməsi və müntəzəm skrininq
Vacib mesaj
Haşimoto tiroiditi, hipotireoz və ya şəkərli diabet hamiləliyə mane deyil. Göstəricilər nəzarətdə saxlanıldıqda, dərman düzgün istifadə edildikdə və təqib müayinələri vaxtında aparıldıqda sağlam hamiləlik və sağlam doğuş mümkündür.
Qeyd
Bu, fərdi proqnoz və ya nəticə vədi deyil. Hər hamiləlik ayrıca qiymətləndirilir və ginekoloqla birgə idarə olunur.
Bu saytdakı məlumat maarifləndirmə məqsədi daşıyır, fərdi diaqnoz və müalicə göstərişi deyil və həkim müayinəsini əvəz etmir. Təcili tibbi vəziyyətdə 103 nömrəsinə müraciət edin.
Sual-Cavab
Tez-tez verilən suallar
Hamiləlikdə tiroid dərmanı qəbul etmək təhlükəsizdirmi?
Hamiləlikdə hipotireozun müalicəsiz qalması müalicənin özündən daha böyük risk daşıyır. Dərman və doza həkim tərəfindən təyin olunur və hamiləlik boyunca tənzimlənir. Dərmanı öz-özünə kəsmək olmaz.
Ramazanda sahura durmadığım üçün tiroid dərmanımı kəsə bilərəmmi?
Xeyr. Dərmanın qəbul saatını dəyişmək mümkün ola bilər, lakin bu, mütləq həkimlə razılaşdırılmalıdır. Dərmanın kəsilməsi göstəricilərin ciddi pozulmasına gətirir.
Haşimoto tiroiditim var, hamilə qala bilərəmmi?
Haşimoto tiroiditi özlüyündə hamiləliyə mane olan diaqnoz deyil. Vacib olan hormon göstəricilərinin hədəfdə saxlanması və müntəzəm təqibdir.
Hamiləlik diabeti doğuşdan sonra keçirmi?
Hamiləlik diabeti adətən doğuşdan sonra geri dönür, lakin bu qadınlarda gələcəkdə tip 2 diabet riski yüksək qalır. Buna görə doğuşdan sonra və sonrakı illərdə müntəzəm qan şəkəri nəzarəti tövsiyə olunur.
Digər istiqamətlər
Fəaliyyət istiqamətləri
Şəkərli diabetin idarə olunması
Diaqnozdan uzunmüddətli təqibə qədər: dərman seçimi, hədəf göstəricilər, ağırlaşmaların erkən aşkarlanması.
ƏtraflıÇəki idarəetməsi və piylənmənin müalicəsi
Çəki artımının səbəbi araşdırılır; həyat tərzi, tibbi müalicə və lazım gəldikdə cərrahi yönləndirmə.
ƏtraflıQalxanabənzər vəzin ultrasəs müayinəsi
Qəbul zamanı həkim tərəfindən icra olunan tiroid USM-i.
Ətraflı