Şəkərli diabetin idarə olunması
Diaqnozdan uzunmüddətli təqibə qədər: dərman seçimi, hədəf göstəricilər, ağırlaşmaların erkən aşkarlanması.
ƏtraflıEndokrinoloq qəbulu
Anamnez, fiziki müayinə və hədəflənmiş laborator qiymətləndirmə ilə tam endokrinoloji baxış.
Qısa cavab
Endokrinoloq qəbulu hormonal və metabolik pozğunluqların aşkarlanması üçün aparılan tam tibbi baxışdır. Qəbul üç hissədən ibarətdir: ətraflı anamnez (şikayətlər, xəstəlik tarixçəsi, ailə anamnezi, qəbul edilən dərmanlar), fiziki müayinə və hədəflənmiş laborator-instrumental qiymətləndirmə. Diaqnoz bu üç mənbənin birlikdə dəyərləndirilməsi ilə qoyulur.
Hansı əlamətlərdə endokrinoloqa müraciət etməli?
Endokrin xəstəliklər fərqli simptomlarla özünü göstərir və xəstələr çox vaxt əvvəlcə başqa ixtisas həkimlərinə müraciət edir. Aşağıdakı şikayətlər endokrinoloji müayinə üçün əsasdır:
- Yuxululuq, fikri cəmləyə bilməmək
- Emosional dəyişkənlik, əsəbilik
- Səbəbsiz çəki itkisi və ya çəki artımı
- Davamlı yorğunluq və halsızlıq
- Artmış tərləmə
- Saç tökülməsi, dırnaqların zəifləməsi
- Aybaşı pozğunluğu
- Dərinin quruluğu və ya artmış yağlılığı
- İstiyə və ya soyuğa dözümsüzlük
- Əllərdə titrəmə
- Kişilərdə süd vəzilərinin böyüməsi (ginekomastiya)
- Ürək döyüntülərinin normadan az və ya çox olması
- Arterial təzyiqin normadan yüksək və ya aşağı olması
- Görmənin zəifləməsi
- Qalxanabənzər vəz nahiyəsində şişkinlik və ya ağrı
- Su tələbatının artması
- Sidik ifrazının intensivliyinin artması
- Cinsi istəyin azalması
- Uzun müddət keçməyən yaralar, təkrarlanan infeksiyalar
Bəzən endokrin xəstəliklər heç bir klinik əlamət vermədən irəliləyir və orqan zədələnməsi mərhələsində aşkarlanır. Ailənizdə şəkərli diabet, tiroid xəstəliyi və ya piylənmə varsa, şikayət olmadan da profilaktik müayinədən keçmək məsləhətdir.
Qəbul necə keçir?
Anamnez
Şikayətləriniz, nə vaxt başladığı, necə dəyişdiyi soruşulur. Keçirdiyiniz xəstəliklər, əməliyyatlar, ailə anamnezi qeyd olunur. Hazırda qəbul etdiyiniz bütün dərmanlar — adı və dozası ilə — yazılır.
Fiziki müayinə
Boy, çəki, bədən kütlə indeksi, bel çevrəsi, arterial təzyiq, nəbz ölçülür. Qalxanabənzər vəz nahiyəsi, dəri, büküş yerləri, ayaqlar müayinə edilir.
Əvvəlki nəticələrin dəyərləndirilməsi
Gətirdiyiniz analizlər və müayinələr xronoloji ardıcıllıqla nəzərdən keçirilir.
Müayinə təyinatı
Ehtiyaca görə laborator testlər təyin olunur. Qalxanabənzər vəz üçün ultrasəs müayinəsi qəbul zamanı icra edilir.
Plan
Diaqnoz dəqiqləşdikdən sonra müalicə planı qurulur, izah edilir və növbəti nəzarət tarixi təyin olunur.
Nə gətirmək lazımdır?
- Əvvəlki laborator analizlərinizin nəticələri (mümkün qədər köhnədən yenisinə doğru)
- Ultrasəs, rentgen, tomoqrafiya, ssintiqrafiya nəticələri
- Hazırda qəbul etdiyiniz bütün dərmanlar — qutusu ilə birlikdə və ya adı və dozası yazılmış vərəqdə
- Şəkər ölçmə dəftəriniz varsa — özü ilə
- Şəxsiyyət vəsiqəsi və sığorta sənədi (varsa)
Tövsiyə: Dərmanların qutu üzərindəki ad hissəsini kəsib bir vərəqə yapışdırın və ya şəklini çəkin. "Bir dənə qırmızı dərman içirəm" cavabı düzgün müalicə seçimini çətinləşdirir və səhvə yol aça bilər.
Bu saytdakı məlumat maarifləndirmə məqsədi daşıyır, fərdi diaqnoz və müalicə göstərişi deyil və həkim müayinəsini əvəz etmir. Təcili tibbi vəziyyətdə 103 nömrəsinə müraciət edin.
Sual-Cavab
Tez-tez verilən suallar
Ac gəlmək lazımdırmı?
Qan şəkəri, insulin, lipid profili kimi testlər planlaşdırılırsa ac gəlmək tələb oluna bilər. Qeydiyyat zamanı bunu dəqiqləşdirin. Qalxanabənzər vəzin ultrasəs müayinəsi üçün ac və ya tox olmağın fərqi yoxdur.
Analizsiz müalicə yaza bilərsinizmi?
Endokrinologiyada laborator müayinə diaqnozun əsas dayaqlarındandır. Analiz olmadan yazılan dərman ya təsirsiz olur, ya da zərər verə bilər. Buna görə müayinəsiz müalicə başlanmır.
Nə qədər müddətə nəticə görəcəyəm?
Bu, diaqnozdan asılıdır. Bəzi hormonal pozğunluqlarda göstəricilər həftələr ərzində, bəzilərində aylarla dəyişir. Endokrin xəstəliklərdə dərman dozası hədəfə çatana qədər tədricən tənzimlənir — buna görə təqib müayinələri vacibdir.
Uşaqları da qəbul edirsinizmi?
təsdiq gözlənilir
Digər istiqamətlər
Fəaliyyət istiqamətləri
Çəki idarəetməsi və piylənmənin müalicəsi
Çəki artımının səbəbi araşdırılır; həyat tərzi, tibbi müalicə və lazım gəldikdə cərrahi yönləndirmə.
ƏtraflıQalxanabənzər vəzin ultrasəs müayinəsi
Qəbul zamanı həkim tərəfindən icra olunan tiroid USM-i.
ƏtraflıTiroid incə iynə aspirasion biopsiyası
Şübhəli düyünlərdə xoşxassəli/bədxassəli fərqinin dəqiqləşdirilməsi.
Ətraflı